EURO-2012: то оғози бозиҳо 2 рӯз монд

Душанбе, 5 июн. ( АМИТ «Ховар», Аловиддин Бӯриев).- Рӯзи 8 июн дар ду кишвар: Украина ва Лаҳистон бозиҳои ниҳоии ҷоми Аврупо доир ба футбол оғоз меёбанд. Ҳашт шаҳри ин кишварҳо: Варшава, Вротслав, Гданск ва Познани Лаҳистон, Киев, Донетск, Харков ва Лвови Украина варзишгаронро ба оғӯши худ мегиранд. Расми кушоиши бозиҳо пеш аз вохӯрии байни дастаҳои Лаҳистон ва Юнон дар соати 8 шом ба вақти Тоҷикистон шурӯъ мегардад ва ҷамъбасти он рӯзи 1-уми июл дар шаҳри Киеви Украина ба нақша гирифта шудааст.