Гар дасти фитодае бигирӣ, мардӣ

Душанбе, 12 июн. (АМИТ «Ховар», Дилшодаи Хайруллоҳ).- Дастгирии иҷтимоии оилаҳои ниёзманд, ки аз паҳлӯҳои умдаи сиёсати ҳукумату давлат ва бахши муҳими фаъолияти Кумитаи ҷавонон, варзиш ва сайёҳӣ маҳсуб меёбад, чанд сол инҷониб ба ҳукми анъана даромадааст. Кумита 8 июни соли равон дар остонаи 15-умин солгарди Рӯзи Ваҳдати миллӣ дар ноҳияи Тавилдара хатнасури 26 нафар кӯдакро аз оилаҳои камбизоат доир намуд.  Дар чорабинӣ, ки барномаи фарҳангию фароғатиро бо густурдани дастархони идона ва дастрасии маводи мавриди ниёз фаро мегирифт, раиси ноҳия Ҳимматшоҳ Ғайратов ва мудири бахши тарбияи ватанпарастӣ ва кор бо толибилмони кумита Иброҳим Мирзоев иштирок намуда, аз иқдоми роҳбарияти ҳукумату давлат дар ин самт ёдовар шуда, аз ҳозирин, бахусус насли наврасу ҷавон даъват ба амал оварданд, ки ҳамеша барои доштани муҳаббату эҳтиром ба насли калонсол ва арҷ гузоштан ба арзишҳои милливу эҳсоси баланди ватандорӣ талош кунанд.