Густариши муносиботи кишоварзии Тоҷикистону Чин

Душанбе, 18 июн. (АМИТ «Ховар», Дилшодаи Хайруллоҳ).- Ҷиҳати рушди минбаъдаи ҳамкориҳои дуҷониба дар шаҳри Душанбе мулоқоти як гурӯҳ мутахассисони Вазорати кишоварзии Ҷумҳурии Мардумии Чин бо муовинони вазири кишоварзии Тоҷикистон ва сардорони раёсату шӯъбаҳои он доир гардид.  Зимни мулоқот тадқиқотчии Академияи банақшагирӣ ва лоиҳаҳои Вазорати кишоварзии Чин Чжан Ой Хуа иттилоъ дод, ки дар оянда баҳри рушди ҳамкориҳои дуҷониба ва самаранокии истеҳсоли маҳсулоти кишоварзӣ бо кӯмаки мутахассисони Вазорати кишоварзии Тоҷикистон Барномаи самтҳои афзалиятноки кишоварзиро тарҳрезӣ менамоянд. Баҳри омода намудани барномаи мазкур гурӯҳи кории Вазорати кишоварзии Чин бо мутахассисони Вазорати кишоварзии Тоҷикистон аз минтақаҳои ҷумҳурӣ дидан менамоянд.