Илова ба қонуни буҷаи давлатӣ
Душанбе, 11 июн.(АМИТ «Ховар», Марзия Саидова).-Беш аз 30 масъалаи ҳаётан муҳим, ки ба рушди бахшҳои иқтисодию иҷтимоӣ ва илмию фарҳангии кишвар мусоидат менамоянд, 11 июн дар ҷаласаи Шўрои палатаи поёнии парлумони мамлакат баррасӣ гардиданд, ки ворид намудани тағйиру илова ба Қонуни конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон» аз ҷумлаи ин масъалаҳост. Аъзои Шўро ҳамзамон масъалаи ворид намудани илова ба Қонуни конститутсионии Ҷумҳурии Тоҷикистон «Дар бораи интихоботи вакилон ба Маҷлисҳои маҳаллии вакилони халқ», «Оид ба ворид намудани илова ба Қонуни Ҷумҳурии Тоҷикистон «Дар бораи мақомоти худидоракунии шаҳрак ва деҳот», «Дар бораи Буҷети давлатии Ҷумҳурии Тоҷикистон барои соли 2012», «Оид ба ворид намудани тағйирот ба Қонуни Ҷумҳурии Тоҷикистон «Дар бораи созишнома оид ба тақсими маҳсулот», «Дар бораи ворид намудани тағйиру иловаҳо ба Кодекси ҳуқуқвайронкунии маъмурии Ҷумҳурии Тоҷикистон», «Дар бораи ворид намудани тағйиру иловаҳо ба Кодекси мурофиавии ҷиноятии Ҷумҳурии Тоҷикистон», «Дар бораи адабиёти таълимӣ»-ро баррасӣ карданд. Масъалаҳои матраҳшуда ҷиҳати муҳокима ба ҷаласаи навбатии иҷлосияи сеюми Маҷлиси намояндагон, ки 13 июн дар Душанбе баргузор мегардад, пешниҳод гардиданд.