Иштироки Ш.Саид дар ҷаласаи Шӯрои тиҷоратии СҲШ

Душанбе, 6 июн. (АМИТ «Ховар», Покиза Маҳмадбекова). – 5 июн дар шаҳри Пекин ҷаласаи Шӯрои тиҷоратии Созмони ҳамкории Шанхай баргузор гардид. Раиси ПСС ҶТ Шариф Саид, ки раиси бахши миллии Шӯрои тиҷоратии СҲШ аз Ҷумҳурии Тоҷикистон мебошад, дар кори он иштирок намуд. Дар ҷаласа ҳамчунин раисони шӯроҳои миллии тиҷоратии кишварҳои аъзои СҲШ ширкат доштанд.Тавре ки аз Палатаи савдо ва саноати ҷумҳурӣ ба АМИТ «Ховар» хабар доданд, Шариф Саид дар ҷараёни ҷаласа зикр намуд, ки имконияти зиёди ҳамкории мутақобила бо Ҷумҳурии Ӯзбекистон вуҷуд дорад. Мо бо истифода аз равобити чандинасра ва муносибатҳои ҳамсоягии нек бояд барои рушду густариш ёфтани ҳамкориамон ҳамаи чораҳоро бинем.Шариф Саид аз аъзои Шӯрои тиҷоратӣ хоҳиш намуд, ки ба масъалаҳои муҳоҷират таваҷҷӯҳи хоса диҳанд. «Ин бахш яке аз соҳаҳои асосии ҳамкории мо маҳсуб мешавад», — гуфт раиси Палатаи савдо ва саноати ҶТ.