Мӯҳлати ба истифода додани нақб мавқуф гузошта мешавад

Душанбе, 4 июн. (АМИТ «Ховар», Кристина Эрлих). – Мӯҳлати мавриди истифода қарор додани нақби «Шаҳристон» ба арафаи таҷлили 21 – мин солгарди Рӯзи Истиқлолияти давлатии Тоҷикистон мавқуф гузошта мешавад. Аз ин пеш моҳи июни соли ҷорӣ ба истифода додани ин иншоот дар назар буд. Дар ин бора аз Маркази татбиқи лоиҳаи сохтмони роҳи мошингарди «Душанбе — Чаноқ» — и Вазорати нақлиёти ҶТ ба АМИТ «Ховар» хабар доданд. Сабаби асосии ба вақти дигар гузаронидани мӯҳлати ба истифода додани иншоот сар задани душвориҳо бар асари лағжидани қабатҳои замин мебошад. Алҳол кор мувофиқи нақша сурат мегирад. Қобили зикр аст, ки нақби «Шаҳристон» дар 180 – километрии роҳи мошингарди Душанбе — Хуҷанд дар ҳудуди байни ноҳияҳои Айнӣ ва Шаҳристони вилояти Суғд воқеъ аст. Масофаи нақб 5 ҳазору 253 метрро ташкил медиҳад. Сохтмони расмии нақби «Шаҳристон» 22 августи соли 2006 оғоз ёфта буд. Арзиши сохтмони он мувофиқи лоиҳа 175 миллион сомониро ташкил медиҳад.Сохтмони ин нақб яке аз ҷузвҳои лоиҳаи навсозии роҳи мошингарди Душанбе — Чаноқ ба шумор рафта, пудратчии асосии лоиҳа ширкати China Road – и Чин мебошад.