М. Маҳмадаминов доир ба кори иҷтимоӣ сухан гуфт

Душанбе, 14 июн. (АМИТ «Ховар», Зарина Саидова).- Дар факултаи фалсафаи Донишгоҳи миллии Тоҷикистон вохӯрии вазири меҳнат ва ҳифзи иҷтимоии аҳолии Ҷумҳурии Тоҷикистон М. Маҳмадаминов бо донишҷӯён ва ҳайати устодони факулта баргузор гардид. Мақсади вохӯрӣ таваҷҷӯҳи донишҷӯёнро ба муҳиму зурур будани хизматрасонии иҷтимоӣ ба ашхоси имконияташон маҳдуд, алалхусус кӯдакони маъюб ҷалб кардан ва ташкили таҷрибаомӯзии онҳо дар муассисаҳои вазорат буд. Дар вохӯрӣ ректори Донишгоҳи миллии Тоҷикистон, профессор Ҳ. Одинаев ва декани факултаи фалсафаи донишгоҳ Р. Назаров ширкат карданд.Иштирокчиён дар бораи таърихи ихтисоси кори иҷтимоӣ ва зарурияти таълими ин ихтисос дар Тоҷикистон, масоили ҳамкории вазорату ДМТ ва нақшаҳои минбаъда сухан гуфтанд. Зикр шуд, ки таъсиси ин гурӯҳ раванди рушду такомули минбаъдаи соҳаи меҳнат ва ҳифзи иҷтимоии аҳолиро меафзояд. Вазорат бо назардошти он, ки ислоҳоти куллии низоми ҳифзи иҷтимоии аҳолии ҷумҳурӣ ба мутахассисони соҳибкасби соҳа ниёз дорад, иқдоми мазкурро амалӣ намуд. Дар донишгоҳҳои мамлакатҳои рушдёфтаи Аврупо беш аз 100 сол мешавад, ки мутахассисон бо ихтисоси «Кори иҷтимоӣ» тайёр мешаванд. Мутахассисони ин соҳа лар айни замон дар зиёда аз 100 муассисаи таҳсилоти олии Федератсияи Русия, 60 мактаби олии Украина ва 60 мактаби олии Қазоқистону Молдова тайёр карда мешаванд.