Маҳсулоти шишагини истеҳсоли ватанӣ

Душанбе, 12 июн. (АМИТ «Ховар», Кристина Эрлих). – Хати нави технологӣ барои тавлиди банкаҳои як ва ду литра, ки дар корхонаи тавлиди шишаҳои сохтмонии шаҳри Қайроққум мавриди истифода қарор дода шуд, иқтидорҳои истеҳсолии онро тадриҷан афзун мекунад. Тавре ки аз дафтари матбуоти Вазорати энергетика ва саноати ҶТ ба АМИТ «Ховар» хабар доданд, иқтидори шабонарӯзии хати нави технологӣ ба 20 ҳазор адад банка мерасад. Алҳол корхона ҳар шабонарӯз беш аз 10 ҳазор адад банкаҳои як ва ду литра истеҳсол мекунад. Баъди рӯи кор омадани хати нави технологӣ дар корхона ба таври илова 50 ҷойи нави корӣ фароҳам оварда шуд. Қобили зикр аст, ки аввалин корхонаи тавлиди шишаи сохтмонӣ ва банкаҳо бо ибтикори Вазорати энергетика ва саноати ҶТ моҳи марти соли 2011 дар шаҳри Қайроққум бунёд шуда буд. Иқтидори солонаи корхона 1,3 миллион метри мураббаъ шишаи сохтмонӣ мебошад.