Маҷлиси ботантана ба ифтихори Рӯзи ваҳдати миллӣ

Душанбе, 22 июн. (АМИТ «Ховар», Покиза Маҳмадбекова). – 21 июн ба ифтихори Рӯзи ваҳдат ва мусолиҳаи миллӣ дар Ҷамъияти саҳҳомии кушодаи «Агроинвестбонк» маҷлиси ботантана баргузор гардид. Тавре ки аз «Агроинвестбонк» ба АМИТ «Ховар» хабар доданд, дар маҷлис раиси раёсати «Агроинвестбонк» Фаррух Тағоймуродов аҳамияти таърихии ин Рӯзи фархундаро зикр намуда, гуфт, ки 27 июни соли 1997 дар таърихи халқи тоҷик бо ҳарфҳои заррин навишта шудааст. Дар ин рӯз дар шаҳри Маскави Федератсияи Русия бо ризоияти ҷонибҳои мухолиф ва бо миёнаравии кишварҳои мусоидкунандаи анҷоми ихтилофот Президенти мамлакат Эмомалӣ Раҳмон ва роҳбари мухолифини тоҷик Саид Абдуллои Нурӣ Созишномаи ваҳдат ва мусолиҳаи миллии Тоҷикистонро имзо карда буданд.Баъди имзои ин Созишномаи таърихӣ ҷанги шаҳрвандӣ поён ёфта, раванди эҳё ва ҳифзи ҷумҳурии ҷавони мустақил сар шуд. Маҷлис бо иштироки ходими намоёни илмию сиёсӣ Қурбон Восеъ ва шоири шинохтаи кишвар Аскар Ҳаким сурат гирифт.