Маҷлиси саҳмдорони «Агроинвестбонк»
Душанбе, 28 июн. (АМИТ «Ховар», Покиза Маҳмадбекова). – Чанде пеш дар шаҳри Душанбе маҷлиси умумии солонаи саҳмдорони Ҷамъияти саҳҳомии кушодаи «Агроинвестбонк» баргузор гардид, ки дар он аъзои шӯрои мушоҳидону раёсат ва саҳмдорони бонуфузи бонк ширкат доштанд.Тавре ки аз бонки мазкур ба АМИТ «Ховар» хабар доданд, раиси шӯрои мушоҳидони ҶСК «Агроинвестбонк» Талбак Назаров ҳафт масъалаи марбут ба фаъолияти бонкро ҷиҳати баррасӣ манзури ҳозирон намуд. Сипас раиси ҳайати раёсати бонк Фаррух Тағоймуродов дар бораи ҷамъбасти фаъолияти молиявии ҶСК «Агроинвестбонк» дар соли 2011 ҳисобот дод. Бо қарори якдилонаи саҳмдорони бонк ҳисоботи солонаи молиявии он тайи соли 2011 тасдиқ гардида, масъалаҳои ташкилӣ ва масоили дигари рӯзномаи маҷлис мавриди баррасӣ қарор гирифтанд.