Муаррифии ЭКСПО «Чин – АвруОсиё»

Душанбе, 14 июн. (АМИТ «Ховар», Покиза Маҳмадбекова). – 20 июн дар шаҳри Душанбе маросими муаррифии Намоишгоҳи бисёрсоҳавии миллии ЭКСПО «Чин – АвруОсиё» баргузор мегардад. Ин намоишгоҳ аз 1 то 5 сентябри соли ҷорӣ дар шаҳри Урумчии Ноҳияи Мухтори Синҷону Уйғури Ҷумҳурии Мардумии Чин доир мегардад.Тавре ки аз Палатаи савдо ва саноати Ҷумҳурӣ ба АМИТ «Ховар» хабар доданд, дар ин чорабинӣ намояндагони сохторҳои давлатии ноҳияи Мухтори Синҷону Уйғури ҶМЧ ва Тоҷикистон ширкат мекунанд. Иштироки 250 ширкату фирмаҳои Тоҷикистон дар ин намоишгоҳ дар назар аст.Қобили зикр аст, ки тайи 10 соли охир муомилоти моли байни Тоҷикистон ва Чин сад маротиба афзуда, муомилоти солонаи он беш аз 2 миллиард доллари ИМА – ро ташкил дод. Дар Тоҷикистон бо иштироки ҳамтоёни чинӣ беш аз 50 лоиҳаи калони муштараки инвеститсионӣ роҳандозӣ мешавад.