Мулоқоти муовини вазир бо Сафири Қатар

Душанбе, 20 июн. (АМИТ «Ховар», Пайрав Назаров). – Муовини Вазири корҳои хориҷии Ҷумҳурии Тоҷикистон Низомиддин Зоҳидов дар шаҳри Душанбе бо Сафири Давлати Қатар дар Ҷумҳурии Тоҷикистон Сияр Абдураҳмон ал – Мавдаҳ масъалаҳои вазъу дурнамои муносибатҳои дуҷонибаи Тоҷикистон ва Давлати Қатарро муҳокима намуд. Тавре ки аз Раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ «Ховар» хабар доданд, ҷонибҳо ба рушди муносибатҳои иқтисодию тиҷоратӣ майл доштани худро тасдиқ намуданд. Ҷониби Тоҷикистон зикр намуд, ки чунин инфрасохторҳои муҳими соҳа, чун гидроэнергетика, саноати истихроҷи маъдан, кишоварзӣ, ҳамчунин ҷалби инвеститсияҳои Қатар барои татбиқи лоиҳаҳои сохтмонӣ метавонанд самтҳои асосии ҳамкории байни ҳар ду кишвар гарданд.