Мусодираи маводи ҳаҷман калони мухаддира

Душанбе, 11 июн. (АМИТ «Ховар», Мавҷуда Анварӣ). — 10-уми июни соли равон дар натиҷаи амалиёти кормандони ВКД алайҳи гурӯҳи нашъаҷаллобон дар ноҳияи Шӯрообод, дар мавзеи «Деволбарс» миёни кормандони мақомоти корҳои дохилӣ ва гурӯҳи қочоқчиёни афғон задухӯрди мусаллаҳона сурат гирифт. Тавре ки дар сомонаи Вазорати корҳои дохилаи кишвар mvd.tj иттилоъ доданд, ашхоси мусаллаҳи ҷинояткор ба муқовимат тоб наоварда, ба самти Ҷумҳурии Исломии Афғонистон фирор намуданд. Дар вақти тафтиши ҷойи ҳодиса аз пинҳонгоҳи сохтаи қочоқчиёни маводи мухаддир дар ҳудуди мавзеи «Деволбарс» дар чор халта ба миқдори ниҳоят калон 100 кг 160 грамм маводи нашъадори бангдона ва як адад яроқи тамғаи «ТОЗ-16» дарёфт ва мусодира карда шуд.Ҳамчунин, 6-уми июн дар мавзеи номбурда, ҳангоми гузаронидани чораҳои фаврию ҷустуҷӯӣ як гурӯҳи мусаллаҳи нашъаҷаллоб иборат аз шаҳрвандони Афғонистон ошкору безарар гардонида шуд. Задухӯрди мусаллаҳона, ки беш аз ду соат тӯл кашид, сабаби фирори қочоқчиён ба марзи ин кишвар гардид. Аз пинҳонгоҳи нашъаҷаллобон дар 5 борхалта ба миқдори 90 кг 300 грамм маводи нашъадор мусодира карда шуд.