Нафақагирон аз чӣ шикоят мекунанд?

Душанбе, 29 июн. (АМИТ «Ховар», Лаззат Диловарзод).- Тибқи маълумоти Бонки давлатии «Амонатбонк», маблағи аз Агентии давлатии суғуртаи иҷтимоӣ ва нафақаи Вазорати меҳнат ва ҳифзи иҷтимоии аҳолии Ҷумҳурии Тоҷикистон дар моҳҳои январ –майи соли 2012 ба суратҳисоби бонк гузаронидашуда 430 млн. 143,5 ҳазор сомониро ташкил додааст. Ба гуфти масъулини бонк, маблағи барои нафақа ва ёрдампулӣ пардохтгардида бо назардошти бақияи аввали сол (25 млн. 414,4 ҳазор сомонӣ), 441 млн.621,9 ҳазор сомониро ташкил медиҳад. Шумораи нафақагирон то 1-уми июни соли 2012 ба 554 ҳазору 730 нафар расидааст. Бо вуҷуди он ки маблағи нафақа ва ёрдампулӣ аз тарафи Агентии давлатии суғуртаи иҷтимоӣ пурра ба суратҳисоби «Амонатбонк» пардохта шудааст, аммо аз чӣ бошад, ки нафақагирони ноҳияҳои алоҳидаи ҷумҳурӣ аз нагирифтани нафақаи думоҳаашон шикоят доранд. Надодани нафақаи саривақтии нафақагирон хилофи қонунҳои мавҷуда буда, чун ҷиноят арзёбӣ мегардад.