Пешниҳоди Ҷ.Нуралиев

Душанбе, 8 июн. (АМИТ «Ховар», Покиза Маҳмадбекова). – 7 июн дар Вазорати молияи Ҷумҳурии Тоҷикистон мулоқоти муовини аввали Вазири молияи Тоҷикистон Ҷамолиддин Нуралиев бо намояндагони хайати Бунёди байналмилалии асъор бо сардории сариқтисодчии Раёсати даромадҳои маъмурии департаменти оид ба масъалаҳои махсуси Бунёди байналмилалии асъор Эндрю Мастерс баргузор гардид.Тавре ки аз котиботи Вазорати молияи кишвар ба АМИТ «Ховар» хабар доданд, ҷонибҳо ба масъалаҳои такмили рӯи кор овардани андоз, ҳамчунин тадбирҳо дар амри такмил додани таҳрири нави лоиҳаи Кодекси Андози Ҷумҳурии Тоҷикистон таваҷҷӯҳи хоса зоҳир намуданд.Ҷамолиддин Нуралиев аҳамияти такмили рӯи кор овардани андозро қайд намуда, пешниҳод кард, ки таҷрибаи пешқадаму мусбати кори кишварҳои дигар дар ин самт мавриди истифода қарор дода шавад.Ҷ.Нуралиев ба роҳбари ҳайат Эндрю Мастерс барои сӯҳбати пурмӯҳтавояш изҳори миннатдорӣ карда, зикр намуд, ки ҳамкории самарабахш бо Бунёди байналмилалии асъор минбаъд ҳам рушду густариш хоҳад ёфт.