Помидори гармхонаҳои Сибир дар Бадахшон

Хоруғ, 25 июн. (АМИТ «Ховар», Л.Додо). – Мавзеи Челондеҳи Гармчашма яке аз беҳтарин истироҳатгоҳҳои вилоят ба шумор рафта, ҳамасола аз гӯшаю канори кишвар ва берун аз он мардум барои табобат ва истироҳат ба ин ҷо меоянд. Чашмаҳои гарми ин мавзеъ ба ҳазору сад дард давоанд. Агар чанд сол қабл истироҳаткунандагон дар фасли тобистон ҳам кабудию сабзавотро аз бозорҳои шаҳри Хоруғ ва Челондеҳ ба даст меоварданд, имрӯз дар назди ҳар бинои истироҳаткунандагон гармхонаҳо фаъолият доранд, ки дар онҳо тамоми фасли сол помидору бодиринг парвариш карда мешавад. Ба гуфтаи яке аз коргарони ин гармхонаҳо Савригул Мастонова, дар гармхонае, ки ӯ машғули кор аст, 5 намуди помидор ва 2 намуди бодиринг парвариш карда мешавад. Маҳсулоти гармхонаҳоро на танҳо истироҳаткунандагон, балки сокинони деҳоту роҳгузарони самти Қирғизистону Чин низ харидорӣ мекунанд.Масъулини гармхонаҳо тухмиро аз минтақаи Сибири Русия дастрас кардаанд, зеро иқлими он ба ҳавои Бадахшон мувофиқ аст. Дар Челондеҳ сабзавот дар чор фасли сол парвариш карда мешавад.