Проблемаҳо ва дурнамои амнияти биологӣ дар Тоҷикистон

Душанбе, 22 июн. (АМИТ «Ховар», Людмила Дубинина). – Бо ибтикори Сафорати Русия дар Тоҷикистон, намояндагии Ҳамкории Русия дар ҶТ ва Академияи илмҳои Тоҷикистон 21 июн дар Маркази илму фарҳанги Русия воқеъ дар шаҳри Душанбе мизи мудаввар дар мавзӯи «Проблемаҳо ва дурнамои амнияти биологӣ дар Тоҷикистон» баргузор гардид. Дар мизи мудаввар намояндагони корпуси дипломатии мамлакатҳои аъзои ИДМ, шӯъбаҳои байналмилалии вазорату идораҳои Тоҷикистон дар бахши амнияти биологӣ ширкат доштанд. Мақсад аз мизи мудаввар шинос намудани иштирокдорони он бо проблемаҳои умумӣ ва дурнамои бахши амнияти биологию озуқавӣ, фаъолият ва дастовардҳои созмонҳои дахлдор дар ин соҳа буд. Дар ҷараёни ҷаласа вазифаҳо ва ҷустуҷӯи роҳҳои ҳалли амнияти биологӣ мавриди муҳокима қарор гирифта, аз рӯи доираи васеи масъалаҳои мубрами марбут ба амнияти биологию озуқавӣ тавсияҳо ироа шуданд.