Протоколи Тоҷикистону Гондурас имзо шуд

Душанбе, 5 июн. (АМИТ «Ховар», Пайрав Назаров). – 4 июн дар шаҳри Женева маросими имзои протокол дар бораи мувофиқаи дуҷонибаи миёни Ҷумҳурии Тоҷикистон ва Ҷумҳурии Гондурас аз рӯи масъалаи ворид шудани Тоҷикистон ба Созмони умумиҷаҳонии тиҷорат баргузор гардид. Ин ҳуҷҷатро аз ҷониби Тоҷикистон Сафир, намояндаи доимии Тоҷикистон дар шӯъбаи женевагии СММ Салоҳиддин Насриддинов ва аз ҷониби Гондурас Сафир, намояндаи доимии Гондурас дар назди Созмони умумиҷаҳонии тиҷорат Дасио Кастилло имзо намуданд. Дар ин бора аз Раёсати иттилоот, матбуот, таҳлил ва тарҳрезии сиёсати хориҷии Вазорати корҳои хориҷии Ҷумҳурии Тоҷикистон ба АМИТ «Ховар» хабар доданд.