Роҳбари МД «Хоҷагии ҷангал ва шикор» кушта шуд

Душанбе, 14 июн. (АМИТ «Ховар», Мавҷуда Анварӣ). — Шаби гузашта дар шаҳри Душанбе ба ҷони роҳбари Муассисаи давлатии «Хоҷагии ҷангал ва шикор»-и Кумитаи ҳифзи муҳити зисти назди Ҳукумати Ҷумҳурии Тоҷикистон Холмӯъмин Сафаров ҳамлаи мусаллаҳона сурат гирифт. Х. Сафаров аз якчанд тири ба сараш бархӯрда дар ҷойи ҳодиса ба ҳалокат расидааст. Дар ин бора аз маркази матбуоти ВКД ҶТ хабар доданд. Дар айни замон барои таҳқиқи ин қазия гурӯҳи фаврию ҷустуҷӯӣ ташкил шудааст.Холмӯъмин Сафаров 24 январи соли 1955 дар деҳаи Тосқалъаи ноҳияи Восеъ ба дунё омадааст. Хатмкардаи Донишгоҳи миллии Тоҷикистон буда, аз 4 июли соли 2009 то имрӯз ба ҳайси роҳбари МД «Хоҷагии ҷангал ва шикор»-и Кумитаи ҳифзи муҳити зисти назди Ҳукумати Ҷумҳурии Тоҷикистон ифои вазифа менамуд.