Рушди принсипҳои исломии маблағгузорӣ дар Тоҷикистон

Душанбе, 6 июн. (АМИТ «Ховар», Покиза Маҳмадбекова). – Бо ибтикори Ҷамъияти ҳамкории байналмилалии Олмон 5 июн дар Ассотсиатсияи бонкҳои Тоҷикистон мизи мудаввар дар мавзӯи «Рушди принсипҳои исломии маблағгузорӣ дар Тоҷикистон» баргузор гардид.Дар кори мизи мудаввар намояндагони Бонки миллии Тоҷикистон ва ташкилотҳои тиҷоратӣ ширкат намуданд.Танзимгари миллии Барномаи минтақавии «Дастгирии маблағгузории кӯчак дар Осиёи Марказӣ» Хуршед Мироқилов дар бораи кори иҷрошуда дар доираи ба низоми молиявии Тоҷикистон ҷорӣ намудани принсипҳои исломии маблағгузорӣ сухан кард. Тавре ки дар Ассотсиатсияи бонкҳои Тоҷикистон ба АМИТ «Ховар» хабар доданд, иштирокдорони мизи мудаввар масъалаҳои омодагии ташкилотҳои қарзавӣ ҷиҳати роҳандозӣ намудани равзанаи исломиро мавриди муҳокима қарор доданд. Аз рӯи натиҷаи муҳокимаи масъалаҳо тавсияҳо дода шудаанд, ки мақсад аз онҳо тезонидани раванди ҷорӣ намудани принсипҳои исломии маблағгузорӣ дар фаъолияти ташкилотҳои қарзавии Тоҷикистон мебошад.