Сардори БДА шаҳри Ваҳдат аз сафҳои милиса хориҷ шуд

Душанбе, 20 июн. (АМИТ «Ховар», Лутфия Эшонқулова). – Бо фармони Вазири корҳои дохилии ҶТ Рамазон Раҳимов сардори Бозрасии Давлатии Автомобили шаҳри Ваҳдат Хокиро Сӯфиев аз сафҳои милиса хориҷ гардид. Тавре ки маълум гардид, бо айби Хокиро Сӯфиев бар асари садамаи нақлиётӣ шаҳрванд Сироҷиддин Солеҳов ҳалок шуд. Мувофиқи хабари сомонаи расмии Вазорати корҳои дохилии кишвар, 16 июн Хокиро Сӯфиев дар мошини шахсиаш ҳангоми ҳаракат дар кӯчаи Неъмат Қаробоев бехатарии роҳро таъмин накарда, дар натиҷаи ин мошини ӯ ба автомобили шаҳрванд Сироҷиддин Солеҳов бархӯрда ва Солеҳов дар роҳи сӯи беморхона ҳалок шуд.Алҳол аз рӯи ин ҳодиса тафтишот гузаронида ва масъалаи кушодани парвандаи ҷиноӣ мавриди баррасӣ қарор дорад.