Сардори Ситоди умумии Артиши ҶМЧ ба Тоҷикистон меояд

Душанбе, 1 июн. (АМИТ «Ховар», Лутфия Эшонқулова). – Тавре аз маркази матбуоти Вазорати мудофиаи кишвар ба АМИТ «Ховар» хабар доданд, сардори Ситоди умумии Артиши халқии озодихоҳи Чин Чэн Биндэ аз 5 то 7 июн барои боздиди расмӣ ба Тоҷикистон меояд. Чэн Биндэ дар ҷараёни сафараш бо вазири мудофиаи Тоҷикистон Шералӣ Хайруллоев, ҳамчунин бо намояндагони ҳукумат ва Хадамоти дигари ҳарбии ҷумҳурӣ мулоқот анҷом дода, дар маросими гузоштани санги аввали таҳкурсии Хонаи афсарони Вазорати мудофиа иштирок мекунад. Зимни мулоқотҳо масъалаҳои ҳамкории ҳарбию техникӣ ва тарбияи кадрҳои низомӣ мавриди муҳокима қарор мегиранд. Қобили зикр аст, ки ҳамкории ҳарбӣ ва ҳарбию техникии байни Тоҷикистону Чин аз соли 1994 муваффақона рушду густариш меёбад.