Ш. Зуҳуров: «Чин ҳамсояи боэътимод аст»

Душанбе, 7 июн.(АМИТ»Ховар», Марзия Саидова).-«Барои мардуми Тоҷикистон Чин кишвар ва ҳамсояи боътимоду мўҳтарам маҳсуб мешавад», гуфт Шукурҷон Зуҳуров, раиси Маҷлиси намояндагон зимни мулоқот бо Чэн Биндэ, сардори Ситоди генералии артиши халқӣ-озодихоҳи Ҷумҳурии Мардумии Чин. Ш.Зуҳуров ташрифи меҳмони олиқадри чиноиро ба парлумони Тоҷикистон фоли нек арзёбӣ карда, доир ба фаъолияти ин мақоми олии қонунгузор маълумот дод. Мавсуф ба сатҳи ҳамкориҳои мутақобилан судманди Тоҷикистону Чин баҳои баланд дода гуфт, ки ҳамкориҳои Тоҷикистону Чин дар тамоми арсаҳо, бахусус дар бахши низомӣ сол аз сол ривоҷ меёбанд. Ш. Зуҳуров бо ишора ба масоили ҳамкориҳои иқтисодию тиҷоратӣ изҳор дошт, ки дар Тоҷикистон бо кўмак ва сармояи Чин беш аз 50 тарҳи муштарак дар бахшҳои гуногуни иқтисодиёт, хусусан дар заминаҳои энергетика ва коммуникатсия дар ҳоли татбиқ қарор доранд. Мавриди зикр аст, ки тўли солҳои истиқлолият байни Тоҷикистону Чин 150 санади меъёрию ҳуқуқӣ ба имзо расидааст, ки онҳо дар тақвияти муносиботи ду кишвари ҳамҷавор нақши муассир мегузоранд. Созишномаи байни Ҷумҳурии Тоҷикистон ва Ҷумҳурии Мардумии Чин дар бораи ҳамҷавории нек, дўстӣ ва ҳамкорӣ муҳимтарин аснод ба шумор меравад. Сардори Ситоди генералии артиши халқӣ-озодихоҳи Чин Чэн Биндэ низ аз сатҳи ҳамкориҳои кишвараш бо Тоҷикистон дар тамоми соҳаҳо, махсусан дар заминаи амниятиву низомӣ изҳори қаноатмандӣ намуда, гуфт: Чин дорои зарфиятҳои бештари барқарории равобит бо Тоҷикистон буда, ҳар замон омода аст, ки аз ин зарфиятҳо барои миллату мардуми Тоҷикистони дўсту ҳамҷавор истифода намояд. Намояндаи воломақоми артиши Чин ҳамзамон тақвияти муносиботи кишвараш бо Тоҷикистонро дар бахши низомиву амниятӣ ҷиҳати таъмини сулҳу субот дар кишварҳои якдигар ва ҳифзи марзи муштарак муҳим арзёбӣ кард. Мусоҳибон ҳамчунин авзои минтақаро матраҳ намуданд.