Шиносоии Э. Раҳмон аз фаъолияти истеҳсолии ширкати Зи Ҷин

Душангбе, 3 июн. (АМИТ «Ховар»). — Субҳи имрӯз Сарвари давлати Тоҷикистон Эмомалӣ Раҳмон барои шиносоӣ бо фаъолияти истеҳсолии ширкати Зи Ҷин дар конҳои тиллою мис ба шаҳри Шанхани музофоти Фуҷиани Ҷумҳурии Мардумии Чин ташриф овард. Дар майдони Мардумии Шанхан зимни як маросими тантанавӣ мири он Се Хайбо Президенти Тоҷикистон Эмомалӣ Раҳмонро «шаҳрванди фахрӣ»-и ин шаҳр эълон намуда, ба ӯ «Калиди тиллоӣ»-и он ва дипломи шаҳрвандии фахриро тақдим намуд. Мири шаҳри Шанхан нақши Эмомалӣ Раҳмонро дар таҳким ва густариши робитаҳои судманди Тоҷикистону Чин намоён арзёбӣ карда, «шаҳрванди фахрӣ»-и ин шаҳр эълон шудани ӯро боиси ифтихору сарфарозии худ ва сокинони ин маҳал номид. Сарвари давлати Тоҷикистон Эмомалӣ Раҳмон барои қадршиносии баланд ба роҳбарият ва сокинони шаҳри Шанхан арзи сипос карда, изҳор дошт: «эҳсоси ҳусни ҳамҷавориву дӯстии байни халқҳои мо аз қаъри таърих – замони Роҳи Бузурги Абрешим маншаъ мегирад, аз ин рӯ решаҳои дӯстии мо пурқувватанд». «Дар асри бисту як мо якҷоя бо Чин масоили рушди муштаракро ҳаллу фасл мекунем, дӯстии деринаро таҳким мебахшем ва ҳамкориҳоро тавсеа медиҳем», — таъкид дошт Эмомалӣ Раҳмон.Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.