Шумораи мизоҷони «Бонки Эсхата» меафзояд

Душанбе, 5 июн. (АМИТ «Ховар», Покиза Маҳмадбекова). – Шумораи мизоҷони қарзгирандаи Бонки «Эсхата» бештар аз 20 ҳазор нафарро ташкил медиҳад. Мизоҷони ин бонк иборат аз ҳам шахсони воқеию соҳибкорони инфиродӣ ва ҳам корхонаҳои калони истеҳсолии ҷумҳурӣ мебошанд, ки ба соҳаи рушди иқтисодиёт саҳми бузург мегузоранд.Мувофиқи суханони сардори раёсати қарзавии бонки мазкур Носирҷон Орифов, ҳаҷми маблағҳои қарзавии бонк бештар аз 330 миллион сомониро ташкил медиҳад.Рӯи кор овардани бахшҳои қарзавии бонк ба манзури наздик шудан бо мизоҷон ва афзун намудани ҳаҷми маблағҳои ба аҳолӣ қарз додашаванда мутобиқи стратегияи интихобшудаи бонк барои солҳои наздиктарин дар амал татбиқ карда мешавад.Қобили зикр аст, ки як худи моҳи апрел дар ноҳияҳои Панҷакент, Ёвон, Ҷалолиддини Румӣ ва дар шаҳри Конибодом боз 4 шӯъбаи маркази бонкӣ ифтитоҳ гардид.