«Сомон Эйр» соҳиби боз як Боинг 737-300 гардид

Душанбе, 14 июн. (АМИТ «Ховар», Мавҷуда Анварӣ). — Ширкати ҳавопаймоии «Сомон Эйр» соҳиби боз як ҳавопаймои Боинг 737-300 гардид.Тавре ки аз хадамоти матбуоти ширкати ҳавопаймоӣ хабар доданд, ҳавопаймо ба тарзи лизинги молиявӣ гирифта шуда, дорои 149 ҷойи нишаст мебошад. Дар хусуси дастрас кардани ин ҳавопаймо миёни ширкати «Сомон Эйр» ва «Boeing Capital Corporation» гуфтушунид анҷом пазируфт.Мақомоти раҳбарии ширкат тасмим гирифтааст, ки ҳавопаймои навро ба исми Қаҳрамони миллии Тоҷикистон Нусратулло Махсум номгузорӣ кунад.Ёдовар мешавем, ки дар айни замон ширкати ҳавопаймоии «Сомон Эйр» дорои 6 ҳавопаймо – ду Боинги 737-900, ду Боинги 7337-800 ва ду Боинги 737-300 аст.