Таҷҳизоти нав барои корхонаҳои саноатӣ

Душанбе, 13 июн. (АМИТ «Ховар», Кристина Эрлих). – Корхонаҳои соҳаи мошинсозӣ ва кимёвии Вазорати энергетика ва саноати ҶТ барои рушди соҳаи саноати кишвар технологияҳои нав ба даст оварданд. Дар семоҳаи аввали соли 2012 барои коргоҳу корхонаҳои навташкили саноати мошинсозӣ ва кимиё ба ҷумҳурӣ ба маблағи беш аз 900 ҳазор доллари ИМА таҷҳизот ва хатҳои нави технологӣ оварда шуд. Тавре ки аз маркази матбуоти Вазорати энергетика ва саноати ҶТ ба Амит «Ховар» хабар доданд, барои корхонаи Ҷамъияти масъулияташ маҳдуди «Сайқал» — и шаҳри Қайроққуми вилояти Суғд ҷиҳати коркарди такрории пластмасс ба маблағи 19 ҳазору 200 доллари ИМА таҷҳизоту хати нави технологӣ оварда ва насб карда шуд. Корхонаи мазкур дар ҳудуди вилояти Суғд партовҳои пластмассиро ҷамъ оварда, баъди коркард аз онҳо ғелакҳои пластмассӣ тавлид мекунад. Қобили зикр аст, ки дар ин давра дар корхонаҳои Ҷамъияти масъулияташ маҳдуди «Такшӯ» — и шаҳри Душанбе, Ҷамъияти масъулиташ маҳдуди «Тли Перс» , Ҷамъияти масъулияташ маҳдуди «Алмос», — и шаҳри Ваҳдат ва дар корхонаҳои дигар таҷҳизоти нави технологӣ насб гардид, ки ин на фақат вазъи истеҳсолотро беҳтар намуд, балки сифати маҳсулотро низ баланд бардошт.