Таассуроти сайёҳони ҳоландӣ аз табиати Тоҷикистон

Душанбе, 19 июн. (АМИТ «Ховар», Мавҷуда Анварӣ). — Дар Донишкадаи соҳибкорӣ ва хизмат мулоқоти сайёҳони ҳоландӣ бо донишҷӯён ва устодон баргузор гардид. Ин мулоқот бо ташаббуси роҳбарияти факултаи туризм ва хадамоти гумрукӣ доир гашт. Сайёҳон нақл карданд, ки аз кишвари Ҳоланд ба Тоҷикистон дар ҳайати гурӯҳи ҳафтнафара ташриф овардаанд. Онҳо аз тамошои табиати дилнишини Тоҷикистон, бахусус шаҳри бостонии Истравшан, соҳили дарёи Зарафшон ва кӯли афсонавии Искандаркӯл лаззат бурдаанд. Ба сайёҳони ҳоландӣ табиати тамошобоби Бадахшон низ хеле писанд омадааст, ки ба ақидаи эшон дер боз дар хотироташон хоҳад монд. Бахусус, дидани чашмаҳо бо обҳои гарму хунук дар ноҳияҳои Шуғнону Ишкошим, кӯли баландкӯҳи Булункӯл ва амсоли инҳо. Дар фарҷом миёни донишҷӯён ва сайёҳон доир ба масоили туризм мубодилаи афкор сурат гирифт.