Табодули ёддоштҳо оид ба «Барномаи дастгирии Япония»
Душанбе, 11 июн. (АМИТ «Ховар», Пайрав Назаров).- 11 июни соли 2012 вазири корҳои хориҷии Ҷумҳурии Тоҷикистон Ҳамрохон Зарифӣ ва сафири Ҷопон дар Ҷумҳурии Тоҷикистон Ҳироюки Имаҳаши роҷеъ ба «Барномаи дастгирии лоиҳаи рушди захираҳои башарӣ дар чаҳорчӯби кӯмакҳои бебозгашти Япония» табодули Ёддошт намуданд. Барномаи дастгирии лоиҳаи рушди захираҳои башарӣ барои кишварҳои рӯ ба тараққӣ, ки ниёзи зиёд ба рушди захираҳои башарӣ дар сохтори қонунгузорӣ, иқтисодиёт, менеҷмент ва муносибатҳои байналмилалӣ доранд, нигаронида шудааст. Ин лоиҳа дар Ҷумҳурии Тоҷикистон барои 4 сол пешбинӣ шуда, аз соли 2009 шурӯъ гардидааст. Барнома кӯшишҳои Ҳукумати Ҷумҳурии Тоҷикистонро баҳри рушди захираҳои башарӣ дастгирӣ намуда, ба хизматчиёни ҷавони давлатӣ имкон медиҳад, то маҳорати касбии худро такмил диҳанд.