Тоҷикистон ду зина боло рафт

Душанбе, 7 июн. ( АМИТ «Ховар», Аловиддин Бӯриев).- Дар феҳристи навбатии Федератсияи байналмилалии футбол Тоҷикистон мавқеашро дигар карда, ду зина боло баромад ва кунун дар зинаи 129-ум қарор дорад. Ин ҷаҳиш имкон дод, то Тоҷикистон миёни ҷамоҳири собиқи Шӯравӣ аз Туркманистон, Молдова, Қазоқистон ва Қирғизистон пеш гузарад. Чун пешина дастаи мунтахаби Испания байни 208 кишвар дар ҷои аввал аст. Уругвай дар мақоми дуввум ва Олмон дар ҷои сеюм ҷойгир аст. Дар радифи даҳ дастаи беҳтарини ҷаҳон, инчунин, Ҳолланд, Бразилия, Инглистон, Аргентина, Хорватия, Дания ва Португалия мавқеъ доранд. Байни дастаҳои Осиё Тоҷикистон дар зинаи 17-ум қарор дорад. Ҷопон , Австралия, Кореяи Ҷанубӣ , Эрон , Ӯзбекистон ,Чин, Ироқ , Урдун , Кувайт ва Кореяи Шимолӣ даҳ дастаи пешқадами қораи Осиё мебошанд.