Варзишгарон соҳиби 10 медали тилло гардиданд

Душанбе, 29 июн.(АМИТ «Ховар», Фирӯза Давлатова).- Тибқи иттилои Кумитаи ҷавонон, варзиш ва сайёҳии назди Президенти Ҷумҳурии Тоҷикистон мусобиқаи қаҳрамонии Осиё оид ба варзиши дастхобонӣ дар шаҳри Гургони Эрон баргузор гардид. Дар он варзишгарон аз 10 кишвар – Индонезия, Қазоқистон, Қирғизистон, Муғулистон, Тоҷикистон, Ӯзбекистон, Чин, Ҷопон, Ҳиндустон ва Эрон ширкат доштанд. Варзишгарони тоҷик дар мусобиқа бо вазни 90 кг байни мардон дар рақобатҳои инфиродӣ ҳам бо дасти рост ва ҳам бо дасти чап ду медали тилло ба даст оварданд. Инчунин варзишгарони тоҷик барои ширкат дар мусобиқаи қаҳрамонии дастхобонии ҷаҳон, ки аз 12-ум то 21-уми сентябри соли ҷорӣ дар шаҳри Сан-Паулуи Бразилия баргузор мешавад, омодагӣ мегиранд. Дар ҷамъбаст дастаи мунтахаби Тоҷикистон бо касби 10 медали тилло, 5 нуқра ва 6 биринҷӣ дар ҳисоби умумидастаӣ пас аз тимҳои Эрон, Қазоқистон ва Ӯзбекистон дар ҷои чаҳорум қарор гирифт.