Захираҳои генетикии наботот оқилона истифода мешаванд

Душанбе, 11 июн.(АМИТ «Ховар», Марзия Саидова).- Интизор меравад, ки лоиҳаи Қонуни Ҷумҳурии Тоҷикистон «Дар бораи ҷамъоварӣ, нигоҳдорӣ ва истифодабарии оқилонаи захираҳои генетикии набототи корам» 13 июн дар ҷаласаи навбатии иҷлосияи сеюми Маҷлиси намояндагон баррасӣ ва қабул хоҳад гашт. Масъали мазкур 11 июн дар ҷаласаи Шўрои палатаи поёнии парлумони мамлакат, ки таҳти раёсати Шукурҷон Зуҳуров, Раиси Маҷлиси намояндагон баргузор гардид, матраҳ шуд. Саиди Ёқубзод, раиси Кумитаи палатаи поёнии парлумони мамлакат нисбати масъалаи мазкур табодули назар карда гуфт: лоиҳаи қонун асосҳои ҳуқуқии сиёсати давлатиро дар соҳаи ҷамъоварӣ, нигоҳдорӣ ва истифодабарии оқилонаи захираҳои генетикии набототи корам, аз ҷумла ҳамавлодони худрўи онҳоро бо мақсади пешбурди соҳаи кишоварзӣ, таъмини амнияти озуқаворӣ, экологӣ ва захираҳои биологӣ, амалӣ намудани фаъолияти илмӣ-таҳқиқотӣ, селексионӣ ва таҳсилотӣ, инчунин таъмини нигоҳдории мероси иҷтимоию фарҳангӣ ва таърихиро барои манфиатҳои наслҳои имрўзу оянда муқаррар менамояд.