Журналистони «Big Media Group» дар Суғд
Душанбе, 1 июн. (АМИТ «Ховар», Бекназари Абӯбакр). — Гурӯҳи рӯзноманигорони ширкати иттилоотию машваратии «Big Media Group» 30 майи соли равон бо мақсади шиносоӣ ба вилояти Суғд ташриф оварданд. Сафари онҳо бо боздид аз мавзеъҳои назаррабои ноҳияҳои Айниву Панҷакент, аз ҷумла Искандаркӯл, ҳафриёти ёдгории аҳди кишоварзии Саразми 5500-сола шурӯъ гардида , имрӯз дар маркази вилоят-шаҳри Хуҷанд идома меёбад.Аз хадамоти матбуоти раиси вилояти Суғд ба АМИТ «Ховар» иттилоъ доданд, ки гурӯҳи рӯзноманигорони «Big Media Group» аз маҷмӯаи Регистони Панҷшанбе, масҷиди шайх Муслиҳиддин, корхонаҳои саноатии «Ҷавонӣ» ва «Қолинҳои Қайроққум», инчунин аз мавзеъҳои истироҳативу фароғатии «Баҳри Тоҷик» боздид менамоянд.