Ҷамъомади маъюбон дар китобхона

Душанбе, 6 июл. (АМИТ «Ховар», Музаффар Рустамов).- 6 июли соли ҷорӣ дар Китобхонаи миллии Тоҷикистон бахшида ба Рӯзи маъюбон ва пиронсолон (расман 8-июль ҳамасола аз соли 2004 қайд мегардад) бо иштироки намоянданони Маркази минтақавии хизматрасонӣ ба нафақахӯрон ва маъюбони шаҳри Душанбе, ташкилоти Ҷамъияти нобиноёни ҷумҳурӣ, Ҷамъияти маъюбони шаҳри Душанбе ва Ҷамъияти кару гунгҳои Ҷумҳурии Тоҷикистон таҳти унвони “Гулҳои як чаман” ҷамъомад доир гардид. Бояд тазаккур дод, ки ғамхорӣ нисбат ба ятимон, маъюбон, нафақахӯрон, пиронсолони барҷомонда ва дастгирии иҷтимоии оилаҳои камбизоат яке аз самтҳои асосии сиёсати иҷтимоии Ҳукумати мамлакат маҳсуб меёбад. Давлат дар ин замина тамоми чораҳоро меандешад, то ки ин гурӯҳи осебпазири аҳолӣ худро бе пушту паноҳ ва беҳифзу ҳимоя эҳсос накунанд.