Ҷинояткорон дар ҳудуди Афғонистон боздошт шуданд

Душанбе, 26 июл. (АМИТ «Ховар», Афшини Муқим).- Раҳматулло Набил- Раиси умумии амнияти миллии Афғонистон пас аз мулоқот бо Президенти Тоҷикистон Эмомалӣ Раҳмон дар шаҳри Душанбе дар сӯҳбат бо хабарнигорон гуфт: «Пас аз қазияи чанд рӯзи охири Бадахшони Тоҷикистон мо дар натиҷаи гузаронидани амалиёти фаврӣ якчанд ҷинояткореро, ки бо гурӯҳи ҷиноятпешаи ҷониби Тоҷикистон алоқа доштаву дар ноамнии Хоруғ даст доштаанд, дастгир кардем». Ҳамчунин номбурда илова намуд, ки ҷониби Афғонистон тасмим гирифтааст, то барои ҳарчи зудтар ба эътидол даровардани вазъи шаҳри Хоруғ як ҳайати баландрутбаи худро дар шахси раиси бахши сарҳадот, раиси истихборот ва раиси як бахши дифои миллии Афғонистон ба макони ҳодисаи шаҳри Хоруғ фиристад.