83 иншооти ҷашнӣ дар ВМКБ

Душанбе, 9 июл. (АМИТ «Ховар», Лаззат Диловарзод).- Бахшида ба 20-солагии Иҷлосияи XV1 Шӯрои Олии Ҷумҳурии Тоҷикистон дар ВМКБ сохта ба истифода додашудани 83 иншооти ҷашнӣ ба нақша гирифта шудааст,- иттилоъ доданд аз дастгоҳи раиси вилоят ба мухбири АМИТ «Ховар».Ба иттилои манбаъ, то рӯзи ҷашни 20- солагии Иҷлосияи XV1 таърихии Шӯрои Олӣ дар ноҳияи Ванҷ сохтмони нерӯгоҳи хурди барқи обии «Мотравн» дар ҷамоати Язгулом бо иқтидори 300 кВт, ду агрегати нерӯгоҳи барқи обӣ дар маркази ноҳия бо иқтидори 1000 кВт, мактаб-интернат барои 640 нафар хонанда ва сохтмони як мактаби таҳсилоти умумӣ бо 12 синфхона барои 220 ҷойи нишаст дар назар аст. Дар вилоят ҳамчунин сохтмони маркази ҷавонон дар ноҳияи Рӯшон, беморхонаи касалиҳои сил дорои 45 кат, силсилаи сохтмони як қатор иншоот дар маркази нави ноҳияи Шуғнон- шаҳраки Ваҳдат, ҳамчунин сохтмони даҳҳо иншооти дигар, аз қабили марказҳои савдо, биноҳои маъмурӣ, меҳмонхонаҳои замонавӣ то моҳи ноябри соли ҷорӣ дар вилоят мавриди баҳрабардорӣ қарор мегиранд,-афзуд манбаъ.