Амали хайри олимпичиёни тоҷик

Душанбе, 18 июл. (АМИТ «Ховар», Дилшодаи Хайруллоҳ).- Дастаи олимпичиёни тоҷик пеш аз сафар ба шаҳри олимпии Лондон аз хонаи кӯдакони то синни мактабии №1 шаҳри Душанбе дидан намуда, ба онҳо 2 ҳазор сомонӣ кӯмаки молиявӣ намуданд. Ҳамзамон ба 20 нафар кӯдак тӯҳфаҳои хотиравӣ супориданд.Дар расми супоридани тӯҳфаҳо раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон, ҳамзамон ноиби аввали Президенти Кумитаи миллии олимпии Тоҷикистон Маликшо Неъматов иштирок намуда, ин кори хайру савобро чун дастуру супориши Президенти кишвар ва анъанаи неки ниёгонамон арзёбӣ намуд.М. Неъматов дар ҳузури кӯдакон ба иқдомгирандагони ин кори савоб арзи минатдорӣ намуда, ба онҳо дар мусобиқоти дар пешистода иқболи варзишӣ таманно намуд. Инчунин кӯдаконро таъкид намуд, ки минбаъд барои солимии худ тамрин намуда, дар оянда ба монанди ин варзишгарон номбардори давлату миллат гарданд.