Амнияти марзи Афғонистон мустаҳкамтар шудааст

Душанбе, 26 июл. (АМИТ «Ховар», Дилшодаи Хайруллоҳ).- Бисмиллоҳхон Муҳаммадӣ — Вазири корҳои хориҷии Ҷумҳурии исломии Афғонистон пас аз мулоқот бо Президенти Ҷумҳурии Тоҷикистон дар ҷамъи хабарнигорон гуфт: «Мо амнияти Тоҷикистонро амнияти кишвари худ медонем, аз ин рӯ дар самти бартарафсозии мушкилоти пешомада ёрии хешро дареғ нахоҳем дошт». Мавсуф илова намуд, ки имрӯз ҷомеаи ҷаҳонӣ терроризму эксиремизмро ҳамчун таҳдиди муштарак мепиндоранд ва дар самти пешгирии ин зуҳуроти номатлуб бояд якҷоя фаъолият баранд.  Бисмиллоҳхон Муҳаммадӣ гуфт: «Мо қувваҳои худро дар марз бештар кардем, то бародарони тоҷик тавонанд ҷиҳати дастгир намудани ҷиноятпешагон дар амалиёти худ муваффақ гарданд».