Баррасии ислоҳоти милитсия ва ҳолатҳои шиканҷа дар фаъолияти он

Душанбе, 13 июл. (АМИТ «Ховар», Лутфия Эшонкулова).-Мизи мудаввар дар мавзӯи «Стратегияи ислоҳоти милитсия ва бартараф намудани ҳолатҳои шиканҷа дар фаъолияти милитсия» имрӯз ,13 июл дар Душанбе кори худро оғоз кард. Дар он вазири корҳои дохилӣ генерал-лейтенанти милитсия Рамазон Раҳимов , сармутахассиси шӯъбаи кафолатҳои конститусионии Дастгоҳи иҷроияи Президенти Ҷумҳурии Тоҷикистон Ҳайдар Қодиров , Сафири САҲА дар Тоҷикистон Ивар Викки ва сардорони шӯъбаҳои Вазорати корҳои дохилии шаҳру ноҳияҳои ҷумҳурӣ иштирок доранд. Дар мизи мудаввар Р. Раҳимов оид ба рафти ислоҳоти милитсия ва бартараф намудани шиканҷа дар фаъолияти мақомоти корҳои дохилӣ муфассал баромад намуда, зикр кард, ки Вазорати корҳои дохилии Ҷумҳурии Тоҷикистон дар доираи пешгирии шиканҷа ва ислоҳоти милитсия корҳои зиёдеро ба анҷом расонида истодааст. Аз ҷумла, дар шӯъбаҳои Вазорати корҳои дохилӣ дар шаҳр ва ноҳияҳои ҷумҳурӣ ёрдамчии сардори шӯъба оид ба робита бо ҷомеа ташкил карда шуд.