Бо Боинг -737 роҳ ба сўи Боку

Душанбе, 12 июл.(АМИТ «Ховар», Марзия Саидова).-Ширкати ҳавонавардии «Тоҷик Эйр» хати парвози тайёраҳоро ба самти Душанбе-Боку-Душанбе ба роҳ монд. Нахустин парвози тайёраи Боинг-737 аз фурудгоҳи байналмилалии Душанбе 10 июли соли равон соати 7.30 дақиқаи вақти маҳаллӣ ба пойтахти Озарбойҷон шаҳри Боку парвоз намуд. Мусофирон дар зарфи 2 соату 45 дақиқа аз Душанбе ба Боку расиданд. Арзиши чипта барои як мусофири хатсайри Душанбе Боку дар як самт 240 евроро ташкил медиҳад. Бояд тазаккур дод, ки бо ифтитоҳи роҳи ҳавоӣ миёни Душанбе ва Боку ҳамкориҳои ду кишвари собиқ Шўравӣ –Тоҷикистону Озарбойҷон дар соҳаҳои иқтисодию тиҷоратӣ, илмию фарҳангӣ ва соири бахшҳо густариш хоҳад ёфт. Роҳандозии парвози тайёраҳо дар масири Душанбе-Боку аз ҷониби ширкати ҳавопаймоии «Тоҷик Эйр» дар остонаи сафари расмии Президенти Ҷумҳурии Тоҷикистон Эмомалӣ Раҳмон ба Ҷумҳурии Озарбойҷон сурат гирифта, дар тавсеаи робитаҳои ҳасанаи ҳар ду кишвар нақши муассир хоҳад гузошт.