Боварӣ ба бонкҳо бештар шуд

Душанбе, 6 июл. (АМИТ «Ховар», Лаззат Диловарзод).- Бақияи пасандозҳои бонкҳои ҷумҳурӣ то аввали моҳи июн 4,5 млрд. сомонӣ, ки муодили 950 млн. доллари амрикоӣ мебошад, ташкил дод,- иттилоъ доданд аз маркази матбуоти Бонки миллӣ ба мухбири АМИТ «Ховар». Ба иттилои манбаъ, бақияи пасандозҳо дар моҳҳои январ-майи соли ҷорӣ нисбат ба ҳамин давраи соли гузашта 20,5 фоиз афзоиш ёфтааст. Зиёд шудани ҳаҷми пасандоз натиҷаи ҷалби маблағҳои шахсони воқеӣ ва ҳуқуқӣ мебошад, ки дар асоси боварии пасандозкунандагон ба Бонки миллӣ ва дигар бонкҳои ҷумҳурӣ афзоиш ёфтааст.То 1-уми июни соли ҷорӣ 39,5 фоиз ё 1 млрд. 745,8 млн. сомониро пасандозҳои шахсони ҳуқуқӣ ва 2 млрд. 673,4 млн. сомонӣ ё 60,7 фоизро пасандозҳои шахсони воқеӣ ташкил доданд, ки ин бозгӯ аз боварии шахсони воқеӣ ба бонкҳо нисбат ба солҳои 2000 -2005 мебошад. «Баробари он ки пули мардум аз тариқи пасандоз дар бонкҳо беосеб нигоҳ дошта мешавад, ба онҳо (шахсони воқеӣ ва ҳуқуқӣ) бо фоизи гузошташудаашон фоида ҳам меорад»,- иброз намуданд дар шӯъбаи пасандозу қарзи Бонки миллӣ.