Боздиди намояндагони Бонки ҷаҳонӣ аз «Роғун»

Душанбе, 23 июл. (АМИТ «Ховар», Мавҷуда Анварӣ). — Вазири энергетика ва саноати кишвар Гул Шералӣ имрӯз зимни нишасти матбуотӣ бо хабарнигорони дохилию хориҷӣ иттилоъ дод, ки сабаби аз фаъолият бозмондани корҳои сохтмонӣ дар НБО «Роғун»- ин мавриди назорат қарор гирифтани ин иншооти гидроэнергетикӣ аз ҷониби намояндагони Бонки ҷаҳонӣ мебошад. Тибқи иттилои вазири энергетика ва саноати кишвар рӯзи 19 июли соли ҷорӣ ду намояндаи Бонки ҷаҳонӣ ба Тоҷикистон ташриф овард. Имрӯз як гурӯҳи дигар озими кишвари мо гаштанд ва пагоҳ ба НБО-и «Роғун» мераванду корҳои сохтмонии иҷрошударо мавриди тафтиш қарор дода, хулосаашонро ба Ҳукумати ҷумҳурӣ оид ба ихтисор кардану накардани кормандони иншооти мазкур пешниҳод менамоянд. Ҳамчунин вазир дар мавриди фаъолият накардани Нерӯгоҳи хурди барқи обии «Марзич» гуфт: «Нерӯгоҳи хурди барқи обии «Марзич» сад фоиз ба истифода дода шудааст, бинобар сабаби ҷой нагирифтани ғунҷоиши хатҳои қувваи барқ дар хатҳои пешинаи он фаъолияти нерӯгоҳ каме ба таъхир афтодааст, вале мо ба «Барқи Тоҷик» таъкид кардем, ки аз рӯи иқтидори нерӯгоҳ, ки 4, 3 мегават аст, хатҳои онро ҳарчӣ тезтар азнав барқарор кунанд. Дар нерӯгоҳи мазкур як камбудии дигар низ ҷой дорад. Дар вақти лоиҳакашӣ барои обанбораш маблағ ҷудо накардаанд ва мо супориш додем, ки барои тоза кардан ва сатҳи онро чуқуртар кардан техникаи заруриро сафарбар намоянд, то дар фасли сармо оби обанбор ях накунаду нерӯгоҳ пурра ба фаъолият оғоз намояд»,-таъкид намуд Гул Шералӣ.