Дар Бадахшон супоридани яроқу аслиҳаи ҷангӣ оғоз гардид

Душанбе, 30 июл. (АМИТ «Ховар»).- Бо ташаббус ва дастгирии як гурӯҳ фаъолзанон ва имомони шаҳри Хорӯғ, ки мақсади таъмини оромӣ ва ободии кишварро доштанд, маъракаи супоридани яроқу лавозимоти ҷангӣ оғоз гардид. Тавре сомонаи расмии ВКД ҶТ хабар медиҳад, як гурӯҳ ҷавонони раҳгумзадаи маҳаллаи Заводи нони (Хлебзавод) шаҳри Хорӯғ, ки бидуни андеша ва гумроҳӣ яроқ ба даст гирифта, ба муқобили қувваҳои ҳукуматӣ ба муқовимат бархоста буданд, бегоҳии 28.07. 2012 сол силоҳу лавозимоти ҷангӣ аз қабили автомати Калашников, пулемёт ва дигар силоҳи оташфишонро ба мақомоти ҳифзи ҳуқуқ супориданд.Бояд ёдовар шуд, ки шахсоне, ки ихтиёран яроқҳои ғайрниқонуниро месупоранд, аз ҷавобгарии ҷиноятӣ озод мебошанд. Айни замон вазъ дар Вилояти Мухтори кӯҳистони Бадахшон ором буда, аҳолӣ ба ҳаёти осоишта машғул аст. Ин иқдоми сулҳхоҳона, ки бо мақсади таъмини оромӣ ва субот дар ин минтақа равона гардидааст, аз боиси дастгирӣ буда, умед ба он дорем онҳое, ки силоҳҳои ғайриқонунӣ дар даст доранд, дар наздиктарин фурсат ба мақомоти ҳифзи ҳуқуқ месупоранд.