Деҳаи Миденшор мақоми шаҳракро гирифт

Душанбе, 19 июл.(АМИТ «Ховар», Марзия Саидова).-Номи деҳаи Миденшори деҳоти Поршиневи ноҳияи Шуғнони Вилояти Мухтори Кўҳистони Бадахшон ба Ваҳдат иваз гардида, ба он мақоми шаҳрак дода шуд. Дар робита ба ин аъзои палатаи болоии парлумони мамлакат пешниҳоди Ҳукумати Ҷумҳурии Тоҷикистон ва илтимосномаи Маҷлиси вакилони халқи Вилояти Мухтори Кўҳистони Бадахшонро дар иҷлосияи даҳуми Маҷлиси миллӣ 19 июли соли равон ҷонибдорӣ намуданд. Мамадшо Илолов –раиси Кумитаи Маҷлиси миллӣ гуфт, ки ҳадафи асосии тағйири номи деҳаи Миденшор ба деҳаи Ваҳдат ва ба гурўҳи шаҳрак шомил намудани он тақвияти рушди инфрасохтори маркази ноҳия бо назардошти ҷавобгў набудан ба талаботи замон бинобар маҳдудият, ҷойгир будани бархе аз идораҳои маъмурии он дар деҳоти дигар, инчунин дар ҳолати садамавӣ қарор доштани биноҳои маъмурии он аст. Минбаъд деҳаи Миденшор, ки номаш ба Ваҳдат иваз гардида, мақоми шаҳракро гирифт, дар як вақт ҳамчун маркази маъмурии навтаъсиси ноҳияи Шуғнон маҳсуб меёбад.