Хоҷагиҳо бо сертификат таъмин гардиданд

Кӯлоб, 3 июл. (АМИТ «Ховар», С.Холов). – Ҷиҳати иҷроиши фармони Президенти ҶТ «Дар бораи тадбирҳои иловагӣ оид ба аз навташкилдиҳӣ ва ислоҳоти ташкилотҳои кишоварзӣ» — и Кумитаи заминсозии шаҳри Кӯлоб дар ин давра дар ҳамкорӣ бо маркази кадастри минтақаи Кӯлоб 242 адад хоҷагиҳои деҳқониро тибқи қарори раиси шаҳр таъсис дод, ки аз ин шумора 83 адади он бо сертификати ҳуқуқи истифодаи замин таъмин карда шуданд. Бинобар иттилои раиси Кумитаи заминсозии шаҳри Кӯлоб Рустам Бобохонов ҷиҳати сохтмони ҳар гуна иншоот 429 адад парвандаи заминсозӣ тайёр карда шуда, тибқи қарори раиси шаҳр ба онҳо замин ҷудо карда шудааст. Инчунин аз тарафи кумита ба 160 шаҳрванди дорои сохтмонҳои иншоот сертификати ҳуқуқи истифодаи замин таъмин карда шудааст. Қобили тазаккур аст, ки дастуру супориши Сарвари давлат дар бораи тадбирҳои иловагӣ оид ба рушди соҳаи боғу токпарварӣ дар ҶТ барои солҳои 2010 — 2014 баррасӣ гардида буд.