Китобдорон ихтисоси худро баланд мебардоранд

Душанбе, 24 июл. (АМИТ «Ховар», Раъно Нусратуллоева).- Дар Китобхонаи миллии Тоҷикистон давраи омӯзишӣ барои кормандони китобхона ба охир расид. Машғулиятҳо аз рӯи мавзӯъҳои «Санадҳои меъёрӣ-ҳуқуқӣ доир ба соҳаҳои китобдорӣ», «Таърихи Китобхонаи миллии Тоҷикистон», «Фароҳамоварӣ ва такмили фондҳои китобӣ», «Фонди китобҳои депозитарӣ», «Фонди нусхаҳои хаттӣ ва китобҳои нодир» ва ғайраҳо доир гардид. Ба ғайр аз машғулиятҳо шунавандагон амалан бо кори шӯъбаҳо ва бахшҳои китобхона шинос шуданд.Дар ҷамъомад кормандони собиқадори китобхона Абдуллоҷон Юнусов, Малоҳат Эшонқулова, Гулсара Шукурова, Зулфия Мусофирова, Шариф Комилзода ва дигарон нозукиҳои касби китобдориро ба аҳли ҷамъомад ҳам аз ҷиҳати назарӣ ва ҳам аз ҷиҳати амалӣ фаҳмониданд. Шунавандагони давраи омӯзишӣ баъди анҷоми ҷамъомад соҳиби сертификат мешаванд. Баргузории чунин машғулиятҳои амалӣ барои баланд бардоштани тахассуси китобдорони ҷавон ва нафароне, ки маълумоти махсуси китобдорӣ надоранд, мусоидат мекунад.