Коргоҳи нави истеҳсоли мехи сохтмонӣ

Суғд, 9 июл. (АМИТ «Ховар», М.Амонов). – Бо дастгирии молиявию техникии Вазорати энергетика ва саноати ҷумҳурӣ дар корхонаи воҳиди давлатии «Садаф» — и шаҳри Хуҷанд коргоҳи истеҳсоли мехи сохтмонӣ бо номи «Симмех» ба фаъолият оғоз намуд. Дар ин корхона партовҳои оҳану оҳанпораҳо дар хумдону хати технологӣ гудохта, симҳои бурришу диаметрашон гуногун истеҳсол карда мешавад. Иқтидори солонаи истеҳсоли симҳои сохтмонӣ дар корхона 1000 тоннаро ташкил медиҳад. Дар хатҳои технологии коргоҳи нав мехҳои сохтмонии дарозиашон аз 60 то 150 миллиметра тавлид карда мешавад ва иқтидори истеҳсолии коргоҳ истеҳсоли 2 тонна мех дар як шабонарӯз буда, 15 нафар бо ҷои кори доимӣ таъмин гардидаанд. Маҳсулоти коргоҳи «Симмех» талаботи бозори дохилиро бо мехи сохтмонӣ то андозае таъмин ва воридоти онро аз хориҷи кишвар ҷилавгирӣ менамояд.