Лоиҳае, ки сатҳи дониши табибонро баланд мебардорад

Душанбе, 23 июл. (АМИТ «Ховар», Мавҷуда Анварӣ). – Дар давраи ҳисоботӣ дар чорчубаи ду грант омӯзонидани 129 нафар духтур ва корманди миёнаи тиб ба анҷом расида, омӯзиши 70 нафар мутахассиси тибби оилавӣ идома дорад. Дар ин бора Нурхон Ҳаётов, директори маркази татбиқи Лоиҳаи тандурустии иҷтимоӣ ва заминавӣ зимни як нишасти хабарӣ ба хабарнигорон иброз дошт. Номбурда гуфт: «Аз аввали татбиқи Лоиҳаи тандурустии иҷтимоӣ ва заминавӣ зиёда 1050 нафар мутахассис тайёр карда шуд. Барои баланд бардоштани сатҳи дониши табибони оилавӣ дастгирии семинарҳо дар доираи омӯзиши фосилавӣ низ амалӣ гардид, ки 200 нафар табибро дар бар гирифт. Дар ҳалли мушкилоти баланд бардоштани сифати омӯзиши мутахассисони тибби оилавӣ лоиҳа машварати байналмилалиро оид ба баҳодиҳии сифати тайёр намудани мутахассисони тибби оилавӣ дар Ҷумҳурии Тоҷикистон бо назардошти дархости Вазорати тандурустӣ дастгирӣ намуд».