М. Асрорӣ: «Шароити муассисаҳои фарҳангӣ мувофиқи дил нест»

Душанбе, 18 июл. (АМИТ «Ховар», Мавҷуда Анварӣ). – Имрӯз дар маркази матбуотии ҷумҳуриявии ташкилоти ҷамъиятии «Иттилоот ва муошират» оид ба натиҷаҳои фаъолияти Вазорати фарҳанги ҷумҳурии Тоҷикистон дар нимсолаи аввали соли 2012 нишасти матбуотӣ доир гардид.Дар нишаст вазири фарҳанг Мирзошоҳрух Асрорӣ, мудири шӯъбаи фарҳанги дастгоҳи иҷроияи Президенти ҷумҳурӣ Маҳмадсаид Пиров ва сардорони раёсату шӯъбаҳои вазорат ширкат варзиданд. Дар ҷараёни нишасти матбуотӣ рӯзноманигорон перомуни масоили гуногуни соҳаи фарҳанг, аз қабили масъалаи тарбияи кадрҳои соҳа, гарм кардани муассисаҳои фарҳангӣ дар фасли сармо, рушди фаъолияти китобхонаҳо, масъалаи тайёр намудани дараматургони касбӣ, зиёд намудани сафари ҳунармандони театр ба шаҳру навоҳӣ, татбиқи барномаҳои давлатии рушди соҳа, осорхонаҳою ёдгориҳои таърих таваҷҷӯҳ зоҳир намуда, ба саволҳои сершумори худ посух гирифтанд. Аз ҷумла, Мирзошоҳрух Асрорӣ сабаби гарм набудани толорҳои фарҳангиро дар фасли сармо дар надоштани таҷҳизоти зарурӣ маънидод намуда, як омили дар ин фасл ба театрҳо ҷалб нашудани тамошобинонро низ ба он нисбат дод.