Нархи таълим дар литсей ва гимназияҳои ҷумҳурӣ

Душанбе, 2 июл. (АМИТ «Ховар», Лаззат Диловарзод).- Дар Раёсати муассисаҳои томактабӣ ва миёнаи умумии Вазорати маориф ба мухбири АМИТ «Ховар» иттилоъ доданд, ки дар соли хониши 2011-2012 дар Ҷумҳурии Тоҷикистон 165 литсей ва гимназия 75 ҳазор хонандагонро ба таълим фаро гирифтанд, ки аз он 33 тояшро муассисаҳои таълимӣ-хусусӣ ташкил медиҳанд.
Ба иттилои манбаъ, муассисаҳои таълимӣ- хусусӣ аз ҳисоби маблағҳои шартномавӣ фаъолияти худро ба роҳ монда, барои таълими яксолаи хонандагон тибқи шартнома волидайн аз 400 то 3,5 ҳазор доллар маблағ пардохт менамоянд. Аз ҳисоби маблағҳои шартномавӣ таъмиру таҷдиди биноҳои таълимӣ, хариди маводи таълим ва баргузории ҳамаи чорабиниҳои фарҳангию фароғатӣ гузаронида мешавад. Аз ҳама муҳим, таълим дар ин мактабҳо дар як баст гузаронида шуда, дар басти дуюм танҳо машғулиятҳои иловагӣ ва семинарҳо баргузор мегарданд. Дар ин мактабҳо муаллимон ҳамасола аз тариқи озмун ба кор ҷалб карда шуда, баробари маоши муайянгардида, ба гирифтани 500 сомонӣ маблағи музди иловагии аз ҷониби шаҳрдорӣ ҷудо намуда низ ҳавасманд гардонида мешаванд.